Ala cu pang camalayan canita caras qñg pulitica iñyang pete de y Benigno "Ninoy" Aquino Jr. iñya bali ala mu canacu ing pañgamate na. Yng catutuan na pin niti, e que man quilala canita nung ninu y Ninoy. Aquilala que mu rin y Ninoy angga na mu qñg queluatan.
Yng alus balu da ring malda canita a mica EDSA Revolution uli na ning pañgamate nang Ninoy oneng e y ni ing sangcan nung baquit mica EDSA Revolution canita a migpalaco cang Ferdinand E. Marcos qñg pañga-pamuntuc na ning Filipinas. Mica EDSA Revolution e uling mete ya y Ninoy at e uling memagalsa la ring tauo nune uling mig coup d' etat la ri Defence Secretary Juan Ponce Enrile ampong y Colonel Gregorio "Gringo" Honasan. At iñyang mesipit ing pamag coup d' etat da, sinaup ya y General Fidel V. Ramos carela, anti mu rin mequiabe ne mu rin y Cardinal Sin at meñyad yang saup careng madre ampong malda bang sopan da la ri Enrile ampong Gringo, at queni ne mu meguing EDSA Revolution ing pamag coup d' etat da at meyaus mu ring People Power. Meyari ya ing People Power iñyang meñyad neng saup y Marcos careng Amercanu at peperala yang helicopter ing goviernu na ning America a menibat qñg Clark Air Base at silapo de y Marcos ampo pa ing familia na pabalic carin, caibat dela da la Hawaii.
Pauli na ning People Power a y ni, mequisoso na la reng mañgatacong politicians at pepaquit da mong mig-alsa la ring tauo uli ning pañgamate nang Ninoy Aquino at y Ferdinand Marcos ing sasangcanan dang utac ning pañgamate na. At milucluc yang Presidenti y Corazon "Cory" Aquino a asaua nang Ninoy. Qñg malaguang salita, gueua deng capaquinabangnan ing pañgamate nang Ninoy ba dang acamtan ing capagnasan dang milucluc at manatili qñg goviernu.
Dapot ing maragul a cutang pa mu rin ñgeni nung ninu caya ing pepapate cang Ninoy at nung nanu ing sangcan. Yng pagmulalan da pa reng tauo ñgeni nung baquit icua neng ayari ing pañgapresidenti nang Cory Aquinu at e ta pa mu rin balu nung ninu ing pepapate cang Ninoy. Anti mu rin, presidenti ya ñgeni ing anac da ri Ninoy ampong Cory a y Benigno Simeon "Noynoy" Aquino III oneng ala pa mu rin. Yñya pin ating sasabi a nung meguing neng presidenti ing asaua at anac nang Ninoy at e ne pa mu rin acamtan ing catalauran qñg pañgamate na, macananu la pa caya reng aliuang tauo lalu na reng pacacalulu.
Oneng mimisip cu, palague cu balu da na reng familia nang Ninoy nung ninu ing pepapate caya at nung baquit oneng e da mu buring ipabalu qñg malda uling pota bigla yang magbayu ing pulai ning pulitica qñg Filipinas at mituran la reng ninu mang mequinabang qñg pañgamate nang Ninoy. Atin la pa mu ring e buring ipabalu reng familia nang Ninoy ampo pa reng aliuang politicians anti da ri Fidel V. Ramos, Juan Ponce Enrila, at aliua pa careng tauo. Anti ning abasa cu canita a camag-anac ne canung Cory Aquinu ing pepate cang Ninoy. Bala mu rin ing asabi nang Arnold Clavio canita pa quetang TV program na a mapallaring ala mu canung cacuenta-cuenta ing sangcan nung baquit pepapate de iñya e da na buring ipabalu pa qñg malda. Mapallari ping e ya man pulitical ing sangcan ning pañgamate nang Ninoy at e ya man politician, communist, o e ri Marcos ing pepapate caya nune acapate ne mung Ninoy ing pepapate caya o salapi mung ing sangcan ning pañgamate na at y ti e da na buring ipabalu pa careng tauo ba na mung e gugulu ing pisasabian, at pota macalcal pa ing maracal a calaraman a millari qñg Filipinas at milaco ya pa pañgabayani y Ninoy.
Yng Sala