Masanting ing miliari inyang sinambut yang pamuntuc ning Pampanga (Governor) y Among Ed Panlilio uling buri nang sabian caniti ing reng capampangan reng maliari buri queng sarili dang labuad. Mayap mu naman ing miliari ban canita asubucan ta la reng aliuang cabalen a bisang sumaup qng balen ban canita aquit tamu nung nanu ing apaliari da.
Obat mo pin y Among Ed Panlilio ing sinambut inyang acalaban na la ri Mayor Lilia Pineda ning Lubao ampong ing governor canita a y Mark Lapid? Mumunang dili, mapaliaring e la macaing micasuelu qng pamanibala nang Mark Lapid inyang y ya pa ing governor, mapaliaring e ne apantayan ing agaua nang tatang na a y Lito Lapid canita. Nung aliua y Mark Lapid, obat aliua na mu y Lilia Pineda? Mapaliaring uli na nang Among Ed Panlilio, queni na mapaliaring e ya limput y Lilia Pineda uling atin nang aliuang pipamilinan. Mapaliaring ayisip da, bayu ta ya subucan y Lilia Pineda, obat e ta ya pa mu subucan ing pari a e pa mirinan dinat ning pulitica aguiang ditac.
Quing malaguang salita, di Among Ed Panlilio na mu ampo y Lilia Pineda reng milalaban a ya pin na man ing quelualan na ning alalan. Bandang tauli pin, y la na mu pin reng milalaban at y Among Ed ing sinambut, obat mo ali? Alang maroc nung subucan ta ya y Among Ed Panlilio nung asubucan ta na la reng acalaban na a e ta na man ganap a micasuelu.
Macananu na uari calambat ing panaun a milabas inyang sinambut ya y Gov. Ed Panliliu? Metung a banua ampong capitna na ing milabas. Ating pamiyaliua inyang y Mark Lapid pa ing macalucloc? Ating menibayu qng Pampanga? Ua, susulung ya ing Pampanga; oneng y Gov. Ed Panlilio pin uari ing maquipasari? Oneng e ne man macanita calambat ing metung a banua ampong capitna ban canita atulan ta ya ing pamanibala ng Gov. Ed Panlilio, ale?
Atlu ya mung banua cacaba ing pangagovernor na qng Pampanga. Mecacapitna ne y Gov. Ed Panlilio. Atlu mung banua, macanita cacuyad. Paburen ta yang manibala y Gov. Ed Panlilio at sumaup tamu nung nanu man ing acarapat tamu lalu na qng sarili tamu ampo qng macapadurut quecatamu, sumaup tamu qng pamaniulung na ning Amanung Sisuan a papaten na ning Tagalug, sumaup tamu qng calinisan na ning Labuad Capampangan, sumaup ca aguing ditac mu ing asaup mu.
Ua, pari ya y Gov. Ed Panlilio, dapot liban na ing pamanibala qng Pampanga, cayari na ning atlu nang banua, atulan ta ya careng agaua na anti mong manibala ning Pampanga. Cayari na ning pamanibala nang Gov. Ed Panliliu, carin ta ya lauen nung atin yang masampat a apaliari qng Pampanga. Nung masampat ing agaua na at nung bisa ya pang tagal, obat mo ali ta ya pabureng maniambut pasibayu! Nung namang e tamu micasuelu, atin tamung upaya ban sumubuc caring aliua.
Yng Sala