Queracalan careng mañgaragul a cumpañia, atin la pa mung medical examination bang palaue ra ca nung "fit to work" ca. Miayaliua ing medical examination careng balang clinic oneng maralas ating chest x-ray, eye test, urine test, blood test, drug test, ampong aliua pa. Masuelu la reng ating clinicang anti careni uling e la maguiguisan pascienti uli casing manibatan la reng carelang pascienti careng mañgaragul a cumpañia, at deng cumpañia na mu rin reng mamayad careng medical examination.
Apansinan cu a mabilis lang quiquimut deng magobra careng clinic, sabague, paulit-ulit mu naman ing daraptan da.
Yng masaquit careng medical examination, mallari reng gamitan sangcan reng cumpañia y ti bang e ra na ca tanggapan qñg obra. Anti mo, mipasar ca careng anggang interview ra ampong aliua pang test, at mipasar ca mu naman queng medical examination mu. Oneng patie bigla rang aisip reng queng cumpania a ibalag da ca, gamitan de ing medical examination mu bang e ra na ca tanggapan. Sabian da mu queca ing e ca mipasar qñg medical examination mu. At sabian da mo queca a mallari ca pa mu rin namang mañyad second opinion queng buñga na ning medical examination mu. Papagbalican da ca queng clinic at palaue ca canung pasibayu, uyta mu pin, y ca na ing mamayad qñg quecang cadduang medical examination. Camulañgan da ne!
Aisip cu mu rin a mallari la mu namang manaquitang maragul reng clinic queng anti ning dapat. Sabian da mo queng report da a atin cang saquit queng baga ban canita papagbalican da ca carela bang mañyad second opinion, at uli na nita, macatanggap no na namang bayad a manibatan naman queca.
Maracal la talaga camulañgan reng tauo! Yñya mantun cang obra uling ala cang salapi at saca ra pa daptan queca ing macañian.
Yng Sala